PTK ka nënshkruar një marrëveshje me Raiffeisen Bank për të lansuar produktin e përbashkët për mbushje elektronike (TOP UP)  përmes SMS-it, i cili do t’u mundësojë të gjithë konsumatorëve që të rimbushin telefonat e tyre mobil Pre Paid përmes dërgimit të një SMS-i nga telefoni i tyre.

SMS-i mund të dërgohet edhe atëherë kur llogaria telefonike e klientit është zero. Për të kredituar telefonin, konsumatori duhet që vetëm të dërgojë një SMS me numrin që dëshiron ta mbushë dhe vlerën e kredisë në numrin 50222, pastaj në bazë të kësaj, llogaria e klientit do të debitohet dhe llogaria telefonike do të kreditohet.

Por, paraprakisht për ta përfituar këtë produkt të ri, konsumatorët duhet të ketë llogari aktive në Raiffeisen Bank dhe të nënshkruajnë një kontratë me këtë bankë.

Me këtë marrëveshje reciproke thellohet edhe me tutje bashkëpunimi me një nga bankat më të mëdha në Kosovë dhe në të njëjtën kohë u mundësohet konsumatorëve të të dy kompanive që të kenë më të lehtë komunikimin dhe qasjen në shërbimet që ofron PTK dhe Raiffeisen Bank.